هذا القصيدة رثاء في والدي رحمه الله وغفر له //
أتمنى أن ينال صدق دعائكم
| زفر قبر أبوي وقال وينك ? تعال آبيك | ||
| أنا لي ثلاث أعوام ميت .. ولا همك | ||
| صرخت ! وكأن الأرض تهتز يالبيك | ||
| وياليت بي قدرة على القبر وآضمك | ||
| يبه.. والله إني كل ماضاقت أناديك | ||
| وأصوت يبه روحي تمنى تجي يمك | ||
| أشاهد وجوه الناس .. وأبكي على ماضيك | ||
| وأبعثر حروف ن رددوها على فمك | ||
| نحرت الخفوق الحي قربان لجل أرضيك | ||
| ولجل آصلك وأروي عروقي على جمك | ||
| تداعت لك أعماقي وصرخاتها تبكيك | ||
| وشق الحزن صدري وهو يرتجي لمك | ||
| جروحي صوامع من وجع كلها ترثيك | ||
| وترثيك دمعة مامسحها طرف كمك | ||
| بك إحساس مايوصف ولا يخلق إلا فيك | ||
| وطهارة حرم مكة خذت من بعض دمك | ||
| ياقبر تضمه بك من المسك وآهنيك | ||
| وأسابق زهور الكون وأجري على شمك | ||
| فقدتك بكبر الهم ذا حل في واديك | ||
| وكثر الجروح وكثر ماهمني همك | ||
| وأنا يايبه من كثر ماأشتاق لك وأغليك | ||
| أحسك تناديني .. وهو مبتسم فمك | ||
| (علي) يايبه بأرحل و لكن لاوصيك | ||
| تجمل بربعك.. و الله الله في أمك | ||
| رحل! وإنت ياقلبي تصبر ورى غاليك | ||
| زمن لو ضحك لك لحظة ساعة غمك | ||
| وأنا يايبه وشلون بأنسى غرامي فيك | ||
| وأنا لي ثلاث أعوام رجواي في ضمك | ||
رحم الله موتانا وموتاكم وجميع موتى المسلمين
دمتم بكل ود
،،
رحم الله والدك وأسكنه فسيح جناته
ردحذفو صح لسانك يا مبدع
هذا النص /
ردحذفروحٌ تكتنز الألم ، وبوح ٌ مليئ بالفاجعة ، ودمعة ..
وأخرى :
هو غيمة شعر ، تراود العرش عن نفسه ، وتسكن الأفق لا محالة ..
شكرا ً ياشعر ..
الله عليك يا استاذ علي
ردحذفكتبت وأجدت فــ أبدعت
صح لسانك ايها الشاعر الوارف
رحم الله والدك و والدي وجميع موتا المسلمين..آمين
أمل الحياة